Likisa: Sekretáriu Estadu Kooperativas (SECOOP), Dr. Elizário Ferreira, MM fó pose ba estrutura Kooperativa Paulo De Jesus (KPJ), iha Suku Dato, Postu Administrativu Likisa Villa, Munisípiu Likisa, Loron Tersa-Feira (22/12/2020).
Sekretáriu Estadu Kooperativa (SECOOP),husu ba estrutura Kooperativa Paulo de Jesus (KPJ) kompostu husi dirijente no membru sira atu hametin nafatin sira nia unidade iha servisu hodi hametin sustentábilidade no estabilidade finanseira iha kooperativa nia laran.
“Mensajen ne’ebé husik hela ba dirijenti no estrutura kooperativa ida ne’e nian maka asegura unidade iha kooperativa nia laran, jere kooperativa ho espiritu no prinsípiu kooperativa nian hodi asegura sustentabilidade no asegura estabilidade finanseira”, afirma SECOOP.
Iha fatin hanesan, konselleiru KPJ, Filomeno da Paixão de Jesus, husu ba membru no dirijente sira atu haree kooperativa hanesan sistema ida abranjente liu, preokupa liu ho ema seluk nia susar no dala-ruma bele lori futuru ba sosiedade ida ne’ebé jeneroza komprensiva.
“Hanoin malu liu iha pelu-menus no fundu sentimentu de amor, karidade, komprensaun entre membru sira. Ida ne’e maka maizumenus vizaun husi fundadór sira atu funda kooperativa ida ne’e. Klaru katak primeiru ita tenke iha konseitu ida ne’ebé jenuizu, puru, klaru ho ajuda husi sekretáriu estadu kooperativa ho nia meza iha staff sira konsege infunde ba ita hanoin saida maka konseitu kooperativa ida”, nia
dehan.
Nune’e mós Prezidenti Kooperativa, Ladislau fó agradesementu ba Sekretaria Estadu Kooperativas (SECOOP), tanba fó apóiu finanseiru hodi realiza eventu ne’e lao ho diak.
“Ami agradese ba SECOOP tanba suporta ona KPJ, liu husi fó formasaun nomos apóiu finanseiru hodi realiza aktividade ida ne’e” dehan Nia.
Prezidente ne’e husu nafatin SECOOP nia apóiu hodi ba futuru kontinua fó apóiu fó formasaun iha área kontabilidade nomos finanseiru atu nune’e bele suporta aktividade sira ne’ebé sei realiza iha futuru.
#Media SECOOP#