Ermera : Sekretáriu Estadu Kooperativas (SECOOP), Dr. Elizário Ferreira Reprezenta Governu Sentral hodi sai hanesan Inspektór Serimónia Icar Bandeira Nasionál iha âmbitu Komemorasaun Loron Proklamasaun Independénsia 28 de Novembru ba dala 45 (28 Novembru 1975-28 Novembru 2020), hodi lee diskursu Prezidenti Repúbliku, Dr. Francisco Guterres “Lu’olo ne’ebé realiza iha Autoridade Munisípiu Ermera.
Tema sentral ba komemorasaun ba 28 Novembru nian maka ” Garantia Saúde Públiku no Rekuperasaun Ekonómia Nasionál”.
Enkuantu Inspektór Polísia, Manuel de Deus maka hanesan, Komandante Parada no Yolanda Perreira da Cruz hetan fiar husi autoridade munisipal hodi lori bandeira lulik RDTL.
Serimónia isar Bandeira Nasionál hahu’u iha oras tuku 09:00 no la’o ho diak to’o ramata, maske loron manas halo ema lubun buka fatin mahon maibe la hamate espíritu Nasionalista hodi se’e tilun ba rona diskursu ne’ebé leé husi Sua Exelénsia SECOOP.
Iha testu diskursu Prezidenti Repúbliku husu ba entidade hotu-hotu bele hametin konsensu nasionál hodi haforsa estadu demokrátiku.
“Ita presiza haburas filafali fiar ba malu, atu bele hametin konsensu nasionál hodi haforsa estadu dereitu demokrátiku, haburas dezenvolvimentu sustentadu no sustentável, hasa’e kreximentu ekonómiku iha rai laran; hala’o jestaun ho rigór, transparénsia, efikásia no efisiénsia ba fundu minarai atu ita nia oan no bee-oan sira bele hetan mós benefísiu. Konsensus atu dezevolve maka’as liu agrikultura, nu’udar baze ba ita nia ekonómia nasionál, atu agrikultór sira sai produtivu liu no produz hahán ho kualidade aas no sai fonte rendimentu seguru ba komunidade rurál sira no garante seguransa alimentar iha tempu ne’ebé deit” diskursu PR nian ne’ebé lee husi SECOOP.
Diskursu ikus husi Prezidenti Repúblika nian maka apela ba Timor oan hotu-hotu atu hamutuk lori Timor-Leste ba oin, nuudar estadu soberanu no independente no lori povu ba moris diak.
Ikus liu SECOOP hato’o obrigado wain ba Komisaun Organizadora, Autoridade Munisipal Ermera,Komandante PNTL Munisípiu Ermera, Reprezentante F-FDTL, Amo Paroku Gleno, veteranus husi Minisípiu Ermera, eis titular sira husi Munisípiu Ermera, Ensinu Tékniku Vokasionál (Tekvok) Ernestu Dudu Ermera, Eskola Pre-Secundária 10 Abril, Ensinu Espek Lauala, Eskola Téknika Vokasional Pre-Sekundária, Estajiáriu UNTL, komunidade sira, nomos Entidades hotu-hotu ne’ebe partisipa iha komemorasaun loron Proklamasaun Independensia RDTL ba dala 45 iha Kapital Glenu.
Hafoin Serimónia ramata anima mos atraksaun hanesan, Drum Band husi Eskola Sekundária Nino Konis Santana Glenu, dansa husi Eskola Café Glenu Ermera, Dansa husi Estudante UNTL no Seluk tan.
#Media SECOOP#