Manatuto: Iha Loron Segunda-Feira (18/01/2021), Sekretáriu Estadu Kooperativas (SECOOP), Dr. Elizário Ferreira, MM hala’o vizita kortéjia ba Kooperativa Creditu Uniaun DominHuHun iha Suku Aitias, Postu Administrativu Manatuto Villa, Munisípiu Manatuto hodi haree besik liu tan kondisaun kooperativas nian, ne’ebé maka afeta husi surtu pandemia Covid-19 rasik.
Iha reuniaun ne’e SECOOP husu ba dirijenti kooperativa labele haree ba surtu pandemia covid-19 ne’e hanesan dazáfiu maibe hanesan oportunidade hodi preparaan diak liu tan.
“Durante tinan tolu nian laran ita hasoru krize oin-oin, ikus liu, to’o agora krize sei kontinua la’o maka pesti pandemia covid-19, husi situasaun hirak ne’e fó lisaun mai ita dirijenti kooperativa kreditu union sira atu hadia aan diak liu tan, liu husi formasaun, edukasaun, no imformasaun, hodi nune’e bele benefisia membru sira no komunidade sira” afirma SECOOP
Governante ne’e mós hatutan, ema hotu-hotu tenke iha sentidu perténsia no espíritu kooperativismu nune’e bele kooperativa refere la’o ba oin ho diak liu tan, tanba kooperativas ne’e la’os ema ida nian, maibe ema hotu nian, oinsa maka bele bele kontribui ba kresimentu ekonómia família nian.
Iha fatin hanesan Vise Prezidente Kooperativa CU Dominhu Hum, Tónico de Jesus hateten, kooperativa Domihu Hum durante fó impresta osan ba membru sira, hodi hadia moris iha família laran, balun hola materiál peskas nian, nomos balun halo ba nesidade sira seluk.
“Kooperativa Kreditu DominHuHun harii iha tinan 19 liu ba, no to’o agora iha membru hamutuk ema nain 300 resin, ho kapital osan hamutuk 100.000 resin.” Afirma Vise Prezidente.
Ikus liu membru kooperativa sira sujere ba SECOOP atu futuru fó formasaun ba dirijente no membru kooperativas liu-liu iha área akuntabilidade tanba durante sira sempre hasoru problema kona-ba bainhira sira foti osan maibe susar atu fó fila.
#Média SECOOP#