Lospalos: Sekretáriu Estadu Kooperativas (SECOOP), Dr. Elizário Ferreira, MM ho nian ekipa vizita servisu ba Kooperativa Kreditu Uniaun Afi Saranu ( CUAS), iha Loron Segunda-Feira Kalan (18/01/2020).
Ojektivu husi vizita ne’e maka hodi haree besik liu tan dezenvolvimentu, dezáfiu no difijuldade sira durante Kooperativa refere hasoru iha surtu pandemia covid-19 ne’ebé la’o to’o agora.
Sekretáriu Estadu Kooperativa, Dr. Elizário Ferreira, MM husu ba dirijenti sira atu konsolida malu nafatin iha situasaun saida deit, tanba nu’udar kooperativizmu dezafiu no difikuldade sai oportunidade atu hakat ba oin.
” Hau husu ita dirijente sira tenki buka malu nafatin hodi fó hanoin malu, liu-liu ba membru sira iha espíritu pertênsia kooperativizmu ne’e tenki tau iha fuan nafatin, maske hasoru situasaun oin-oin” afirma SECOOP
Governante ne’e mós garante katak parte Sekretaria Estadu Kooperativas sei fó formasaun no kapasitasaun ba dirijenti inklui membru kooperativa sira, importante maka kooperativa tenki submete uluk proposta, depois maka desidi tempu.
“Kona-ba formasaun nian, Hau nia parte anota no husu ba direnje Afi Saranu buka tempu, atu tékniku sira mai fó formsaun ba imi, hodi intende didiak, kona-ba jestaun no kontabilidade” Hatutan SECOOP.
Kona-ba CU Afi Sarani ninia edifísiu SECOOP husu atu book dadaun edifísiu, uza osan ne’ebé Kooperativa prezerva hela, bainhira lahotu maka parte husi Governu tau osan uituan.
Iha tempu hanesan Vise Prezidente CUAS, Vasco Manuel agradese ba prezensa Sua Excelênsia SECOOP, ne’ebé bele mai vizita Kooperativa Kréditu Uniaun Afi Saranu. Husi vizita ne’e bele fó motivasaun ba kooperativa hodi bele dezenvolve aan diak liu tan.
“Ho vizita ida ne’e katak, enkoraza liu tan ami nia Kooperativa ne’ebé hahú husi 2011 mai to’o agora, atu nune’e ami nia kooperativa bele sai buras liu tan, liu-liu fó responsablidade ba ami dirijente sira, hafanun ami direjente sira atu bele kaer metin responsablidade, tau matan hodi bele habelar liu tan, haburas liu tan, ami nia Kooperativa iha ami nia aldeia, hodi fo asesu ekonómia ba membru sira iha aldeia laran”, dehan Vasco.
Nia dehan, husi membru kooperativa 317 Afi Saranu nian tuir estimasaun ne’ebé maka iha 40% sira hetan susesu.
Tanba ne’e, karik estadu nia programa kona formasaun nian maka iha karik, propoin liu atu realiza formasaun bázika kona ba sistema mekanizmu oinsá atu bele realiza ligasaun ho Kooperativa Kréditu Uniaun ida, atu bele iha mós nia kontinuasaun ba formsaun atu nune’e membru sira, inklui dijente sira, atu bele koñese no komprende liu tan sistema administrasaun no jestaun kooperativa nian, liu-liu ligasaun ho orsamentu iha Kréditu Uniaun Kooperativa nia laran.
#Media SECOOP#